ياحلو فرحتنا بالعيد من زمان واحنا صغار
ذيك الأ يام كنا بنات واولاد
قبل العيد باسبوع في مجلس الوالد...
ينظفون ويفرشون زوالي مع السجاد
ينظفون الوجاغ . ودلة اللقمه. والمزل. والمحماس (1)
ويشيلون الرماد
ومكبة التمر... والمطعمه جديده (2)
ويا السله، شراهم الوالد من العواد
نروح السوق نصبغ النعله في القيصريه
ونشوف شجابوا ثياب جداد
آنه وأمي واخواني ليلة العيد ورا الوالد
نركض للدكاكين البعاد
مسكينه امي كانت فرحانه
وتقايس ثيابنا علينا بنيات واولاد
آنه ابي دراعة وبخنق زري ولخواني طاقيه
وغتره ام نقده
وكوت وفانيلة افراد(3)
وأخوي يزعل من اخوه لاشترا مثله
أو لامنه اشترى أكثر منه أو زاد
أخواني يشترون الطاقيه والغتره
ولا نوريهم أحد يخافون علينا من الحساد
والثوب قالوا ملوّن... يتحمل وسخ
وصفطته كبيره اكبر من المعتاد
أمي تصفّط ثيابنا
ونروح ام سبعه. نسبح
مثل عادتنا في كل الأعياد(4)
قبل طرة النور
نصلي صلاة العيد في المسجد
مع ابونا والأجداد
شحلوها صبحية العيد. وصويلح حالق
على الصفر حلاقة الأجواد
وخليف قذلته على جنب
حلاقة البنسبت
ولا حلاقة ال ابومجدا د
والعيديه ياحلوها
خرده ترسة الجيب
من الحجّي عطانا وزاد
والحجّي في المجلس يتلقى التهاني
من الجيران القراب والبعاد
وصوته يلعلع "القهوا يا صويلح"...
"وين المدخن"..."تفطّن لاتحرق السجاد" (5)
يقولون "عيدكم مبارك" و"فايزين"
واللي بيروح يقول "اشرف الأعياد"
اهلنا والقرايب كلهم حاضرين
عساه عيد مبارك والفرح ينعاد
سليمان من صغره مايستحي
كله يبصبص للبنيات
ويسوي عناد
يسوتل في هالغتره الجديده (6)
ويخرخش الخرده...
بس يشوف بنيات ابعاد
في ذاك العيد أمسكه الحجي
جابه المجلس. ومصع أذانه ولا فاد !!
والحجيه حطت في ثمه مره ودراز...( 7)
ويرجع يسوي عناد وحساد
ذاك العيد بنيه راحت اتصيح عند اهلها...
قالوا عرسوه ...
لايكون هالأمر ينعاد
**
*
ادناه توضيح بعض المصطلحات
الوجاغ المحل الي يشعلون فيه النار(1)
اللقمة هي الدلة الي يغلون فيها القهوة
المزل هي الدلة الرسلان يزلون فيها القهوة ويضيفون فيها الهيل
الحبهان
المحماس هوالي يحمصون فيه حبات القهوة
على النار
**
المكبة معمولة من خوص سعف النخيل
يضع فيها التمر
المطعمه اناء يجمعون فيه الطعام وهو النواء(2)
البخنق هو من انواع الوشاح تضعه البنت على راسها
مطرز بلزري وهو القصب(3)
ام سبعه عين جارية مغتسل للرجال وفيها مكان خاص للنساء (4)
مائها حار
المدخن وعاء مزخرف جميل يوضع فيه الجمر
ويحرق فيه عود الطيب والبخور من الأدخنة الطيبة(5)
الغترة هي الكوفية (6)
الحجية اهي الجدة
المره نوع من الصمغ له رائحة وطعم كريه(7)
مع الدراز الحار يوضع كعقاب في ثم الولد الذي كلامه ماهو زين
التسجيل 
