والله عجيب انت يازمان

في فريج الفوارس
بين احجاره وريحة غباره
وابواب البيوت في كل مكان

والدور اللي هجرها الأنسان
تنتظر في عالم النسيان
تتمنى يرجع ذاك الزمان

سوق البدو ما بيرجع ولا بسطة النسوان ...
واللي راح ما يرجع تغير العنوان

لا الربا ولا حجارة الفضول
ولاغيلة البصيرة ولا التبان

ولا مدقات الجص ولا الصيران
الناس تتغير مثل مايتغير العنوان

لا الشواف ولا الدويل
ولاحجي عيسى بيرجع
ولاجلسة الديوان

وعين الصاغة يشرب منها الفريج
راحت مع بيوت الغدير
ومنازل العلوان

وين منازل آل رمضان
في الدريويزة راحوا
والله يازمان تغير العنوان

وين مجلس ابومنصور مجلس القطان
ومجلس العامر والدكاكين
وعطارة النسوان

والسقف جدوع وسعف النخيل
في الكندية مع الليوان

وابوسنارة في رويزناة الدار والليوان
شنو اللي باقي من ذاك الزمان

والنسمات من رواشن الدار
وفي القيض اتذكرج يادار
واحكي عنج اخبار

وينك يارطب البشرة
على الدخن منشور
مع التين والرمان

وأسأل عن الحبيشية ...
وعن السدره...
وعن الحي العتيج

وعن البساتين ...
والمساجد ...
في كل فريج

مع طلعة نورصبح الجمعه
وذاك العيد واليوم البهيج

ورجعة حجاج بيت الله
فيهم اخوي
واللي فيهم لي صديج

جيت اشم فيك ريحة هلي واشوفك
يا احسن فريج

مابيرجع ذاك الزمان اللي مضى ولا
نسمات عطور واريج

وين رجالك مع ايامك مضوا
ما اظن بيرجع ذاك الذهب العتيج

بقلم بومصطفى علي احمد

في 16\6\1428هـ